Галоўная / Белорусская версия / Навiны / Навiны рэспублiкi
20.01.2022

"Крыніцы гістарычнай памяці": станаўленне беларускай літаратуры абмеркавалі ў НББ

 
Фота НББ
Фота НББ

20 студзеня, Мінск /Кар. БЕЛТА/. Першая публічная лекцыя "Крыніцы гістарычнай памяці", прысвечаная Году гістарычнай памяці, адбылася ў Нацыянальнай бібліятэцы Беларусі, паведамілі БЕЛТА ва ўстанове культуры.

Інтарэс да гісторыі праявілі вучоныя, студэнты, краязнаўцы, журналісты, бібліятэкары. "Яны абнавілі і дапоўнілі ўласныя веды, вялі дыскусію з экспертам, асэнсоўваючы веліч мінулага", - адзначылі арганізатары.

На мерапрыемстве абмеркавалі актуальныя пытанні развіцця беларускай літаратуры і літаратуразнаўства, крыніцазнаўства і медыялінгвістыкі. Удзельнікі пазнаёміліся з навуковымі выданнямі аб старабеларускай літаратуры XI-XVII стагоддзя, каштоўнымі помнікамі і дасягненнямі нацыянальнага пісьменства.

Вядомы беларускі вучоны, дырэктар Інстытута літаратуразнаўства імя Янкі Купалы, член праўлення Саюза пісьменнікаў Беларусі, прафесар Іван Саверчанка ўступіў з тэмай "Беларуская літаратура эпохі готыкі, рэнесансу і барока". Па выніках лекцыі стала відавочна - залаты фонд беларускага народа і яго аналіз у навуковых даследаваннях трэба пераносіць у віртуальнае асяроддзе.

Лекцыі "Крыніцы гістарычнай памяці" праводзяцца ў адкрытым для публікі фармаце і на бясплатнай аснове. Кожная сустрэча прысвечана важнай старонцы мінулага, даследуемай з дапамогай гістарычных крыніц, - летапісаў, рукапісных і старадрукаваных кніг, даўніх карт, гравюр, падпольных і партызанскіх выданняў часоў вайны, твораў беларускай літаратуры, якія захоўваюць гістарычную памяць беларускага народа.

БЕЛТА