Галоўная / Навiны / Навiны рэспублiкi
21.02.2023

Паслы Беларусі і Зімбабвэ абмеркавалі рэалізацыю дамоўленасцей Лукашэнкі і Мнангагвы

 20 лютага, Масква /Эдуард Півавар - БЕЛТА/. Сустрэча пасла Беларусі ў Расіі Дзмітрыя Крутога з паслом Рэспублікі Зімбабвэ ў РФ Амброўзам Муцініры адбылася ў Маскве, паведамілі БЕЛТА ў прэс-службе беларускай дыпмісіі.

"Бакі пацвердзілі ўзаемную прыхільнасць да выканання дамоўленасцей, дасягнутых Прэзідэнтам Рэспублікі Беларусь Аляксандрам Лукашэнкам і Прэзідэнтам Рэспублікі Зімбабвэ Эмерсанам Мнангагвам у ходзе дзяржаўнага візіту кіраўніка беларускай дзяржавы ў Зімбабвэ 30 студзеня - 1 лютага 2023 года. Грунтоўна абмеркавалі планы па пашырэнні палітычнага дыялогу і рэалізацыі насычанага эканамічнага парадку дня", - падкрэслілі ў прэс-службе.

Дзмітрый Крутой адзначыў зацікаўленасць беларускага боку ў забеспячэнні дынамічнага росту аб'ёмаў тавараабароту. Ён заявіў аб гатоўнасці Беларусі да ўдзелу ў чарговым этапе праграмы механізацыі фермерскіх гаспадарак Зімбабвэ шляхам паставак розных відаў сельскагаспадарчай тэхнікі, мадэрнізацыі і будаўніцтва збожжасховішчаў. Наменклатура беларускага экспарту ў гэту краіну павялічваецца таксама за кошт паставак пажарных аўтамабіляў і кар'ернай тэхнікі, прадуктаў харчавання, лякарстваў, тканін і хімічных угнаенняў.

Пасол Беларусі пазітыўна адзначыў кантакты дзелавых колаў дзвюх краін, у тым ліку ў рамках нядаўняга беларуска-зімбабвійскага дзелавога форуму ў Харары.

"Амброўз Муцініры высока ацаніў узровень двухбаковых адносін, падкрэсліў значны патэнцыял для сумеснай работы ва ўсіх сферах супрацоўніцтва - узаемнага гандлю, кааперацыі, дагаворна-прававой базы і іншых. Звярнуў увагу на канструктыўнае ўзаемадзеянне нашых краін на міжнародных пляцоўках і выказаў упэўненасць у захаванні гэтай лініі ў далейшым", - расказалі ў дыпмісіі.

Бакі сышліся на думцы, што важнай састаўной часткай інтэнсіўнага беларуска-зімбабвійскага дыялогу стануць запланаваныя на гэты год візіты на ўзроўні міністраў і пасяджэнне сумеснай пастаяннай камісіі па супрацоўніцтве.

"Дзмітрый Крутой і Амброўз Муцініры высока ацанілі адзінства падыходаў Беларусі і Зімбабвэ да фарміравання справядлівага светаўладкавання, заснаванага на шматпалярнасці і выкананні Статута ААН, выказаліся за ўмацаванне супрацоўніцтва ва ўмовах нарастаючых пагроз суверэнітэту і незалежнасці дзяржаў з боку калектыўнага Захаду, уключаючы незаконныя аднабаковыя санкцыі", - падкрэслілі ў прэс-службе.

"Дзмітрый Крутой запрасіў Амброўза Муцініры наведаць Беларусь для азнаямлення з экспартнымі магчымасцямі нашай краіны. Ён прапанаваў прымеркаваць паездку да буйных выставачна-кірмашовых мерапрыемстваў", - дадалі ў беларускім пасольстве.

БЕЛТА