Работа гарачай лініі КДК па пытаннях ЖКГ прадоўжана да 27 студзеня

Як раней анансавалася, Камітэт дзяржаўнага кантролю з 23 па 25 студзеня праводзіць гарачую лінію па пытанні выканання тэрмінаў і забеспячэння якасці выканання заявак (устаранення прэтэнзій) грамадзян, накіраваных у кантакт-цэнтр 115 і на інтэрнэт-партал "Мая рэспубліка 115.бел".

"За тры дні работы гарачай лініі паступіла больш за 310 званкоў. Большасць зваротаў датычыліся нездавальняючай работы службы 115 і жыллёва-камунальных службаў. Асноўныя пытанні, якія закраналі грамадзяне, звязаны з навядзеннем парадку на прысядзібных тэрыторыях, вулічна-дарожная сетка непакоіць грамадзян, ямачны рамонт, апрацоўка процігалалёднымі сумесямі, своечасовая ўборка ад снегу. Мноства зваротаў паступіла па пытаннях няякаснай уборкі месцаў агульнага карыстання, падтаплення падвалаў, асвятлення дапаможных памяшканняў, вулічнага асвятлення, асабліва ў сельскіх населеных пунктах. У прынцыпе, увесь спектр паслуг, які аказваецца жыллёва-камунальнымі службамі краіны, знайшоў тут адлюстраванне. Таму было прынята рашэнне ў сувязі з вялікай колькасцю зваротаў прадоўжыць гарачую лінію да 27 студзеня", - расказаў Уладзімір Бондар.

Як удакладнілі ў ведамстве, амаль 40 працэнтаў зваротаў паступіла ад жыхароў Мінска. У сваіх зваротах грамадзяне перш за ўсё адзначалі, што часта дазваніцца ў службу 115 не так проста. Не выключаны выпадкі некарэктнай размовы аператараў з грамадзянамі пры прыёме заявак. Але больш за ўсё беларусы незадаволены няякасным і несвоечасовым выкананнем адпаведнымі жыллёва-камунальнымі арганізацыямі неабходных работ.

Напрыклад, жыхары Мінскага раёна неаднаразова звярталіся па пытаннях рамонту асфальтабетоннага пакрыцця дарог і вуліц (у пасёлку Мачулішчы на вул. Кальцавой, аграгарадку Ждановічы на вул. Лясной, аграгарадку Кадзіне на вул. Цэнтральнай), а таксама неабходнасці грэйдзіравання пясчана-гравійных дарог (вёскі Пашкавічы і Клімавічы). Падобная сітуацыя ў аграгарадку Цяхцін Бялыніцкага раёна Магілёўскай вобласці, дзе, са слоў жыхароў, з 2019 года прынятыя службай 115 заяўкі па рамонце вуліц не выконваюцца, а закрываюцца з фармулёўкай "інфармацыя не пацверджана" або "дадзена кансультацыя".

Жыхары Гродна патрабуюць належнага рамонту вуліц Бабіна Гара і Падпярэселка, Віцебска - вул. Церашковай. Мінчане працяглы час чакаюць выканання заявак па пытаннях рамонту праездаў дваровых тэрыторый (напрыклад, каля дома нумар 87 на пр. Ракасоўскага). Шмат зваротаў паступіла па пытаннях няякаснай уборкі месцаў грамадскага карыстання, а таксама навядзення парадку на прысядзібнай тэрыторыі, забеспячэння вулічнага асвятлення.

Усе звароты, якія паступілі, пасля іх апрацоўкі будуць накіраваны ў мясцовыя органы ўлады для прыняцця неадкладных мер рэагавання. Камітэтам дзяржаўнага кантролю будзе забяспечаны кантроль за належным устараненнем выяўленых недахопаў.

Звярнуцца на гарачую лінію можна з 9.00 да 13.00 па тэлефонах: 8 (017) 328-48-23 і 8 (017) 328-54-89, а таксама па кароткім нумары 191.

БЕЛТА